O xurado, presidido polo alcalde Javier Gestal, estivo formado por Silvia Penas, Antía Marante e Armando Requeixo, tendo a función de secretario o técnico de Cultura Carlos Lorenzo. O xurado destaca de 'Especies invasoras' que é un libro de poemas que "explora de xeito radical a identidade, o desarraigo e a violencia estrutural, empregando a metáfora da invasión biolóxica para falar do corpo, da casa e da memoria. Inzada de imaxes poderosas e fragmentadas, onde a casa e o corpo se mesturan nun territorio en constante ruptura, o poemario comparece habitado por animais feridas e restos do vivido. A voz poética móvese entre a crueza e a tenrura creando un espazo onde a violencia familiar, social, histórica- se converte en materia poética. A estrutura fractal e a acumulación de imaxes xeran unha atmosfera de estrañamento na que a fronteira entre o íntimo e o colectivo se dilúe".
