Teófilo Edicións súmase aos lanzamentos polo Ano Castelao

A se sumar aos lanzamentos editoriais con motivo do Ano Castelao, Teófilo Edicións acaba de tirar do prelo Castelao entre Nós. Texto de Francisco López-Barxas e ilustracións de Isabel Pintado compoñen "un achegamento á obra e personalidade do máis destacado compoñente dunha xeración a través dun xeito atractivo, coloquial e xornalístico".

Para conseguir este obxectivo, a obra parte dunha ficcionalización que fai falar o galeguista en primeira persoa a partir da súa propia obra e biografía ademais do que din e contan os seus coetáneos e amigos. Canda á propia personalidade do homenaxeado, o volume repasa desde a ollada deste Castelao a xeración Nós e os movementos culturais e políticos do momento, con especial atención aos seus protagonistas.

O volume recolle tamén unha compilación de textos e declaracións de máis de 40 persoeiros da cultura do país, "dende Antón Vilar Ponte e os integrantes de Nós ata o actual presidente da RAG, Henrique Monteagudo, e o presidente da Fundación Castelao, Miguel Anxo Seixas Seoane, pasando por outros como Carvalho Calero, Torrente Ballester, Cunqueiro, Granell, Novoneyra, Alonso Montero, Xosé Luis Méndez Ferrín, Justo Beramendi e Alfredo Conde, entre outros".

A fechar a obra, unha escolma de poemas dedicadas ao homenaxeado amosa o impacto da súa figura na lírica do país. Ramón Cabanillas, Teixeira de Pascoães, Celso Emilio Ferreiro, Luz Pozo Garza, Uxío Novoneyra, Salvador García Bodaño, Franco Grande, Dario Xohán Cabana, Fiz Vergara Vilariño, ou poemas inéditos realizados para esta edición por Xulio Valcárcel, Carmen Blanco e Claudio Rodríguez Fer compoñen este apartado.