Comezan a restauración do torreón medieval do pazo de Tor

A Deputación de Lugo acometerá a restauración do torreón supervivinte das vellas orixes do pazo de Tor (Monforte de Lemos) como fortificación medieval. O investimento, duns 80.000 euros, ten como obxecto evitar o risco de colapso da estrutura perceptible, debido á carga de auga e humidade que recibe o torreón, vinculado ao espazo do xardín e da casa. O pazo de Tor pertence á rede de museos da Deputación de Lugo e é un dos mellores exemplos de casa señorial visitable conservados en Galicia. Como moitas destas mansións, tivo as súas orixes nunha fortificación baixomedieval, pero non é tan frecuente que os pazos conserven algunha das estruturas defensivas da época. O torreón estaba danado porque a terra situada no interior, ao recibir filtracións de auga, provocaba un peso moi elevado sobre os muros da estrutura. O inicio das obras do torreón non interromperá as visitas ao pazo de Tor.