Agadic convoca as axudas á distribución escénica e musical

O Diario oficial de Galicia publica hoxe as bases da convocatoria anual de subvencións ás actividades de distribución para industrias culturais de artes escénicas e música. A partida que se dedica a isto, parte dos orzamentos xerais da Axencia Galega das Industrias Culturais mantense como o pasado ano nos 600.000 euros a dividir a partes iguais entre ambas disciplinas e en función da modalidade de actividade a apoiar en cada caso, xa sexa distribución directa, asistencia a feiras e festivais, etc.. Estas bases teñen por obxecto determinar as condicións que regularán a concesión en réxime de concorrencia non competitiva de subvencións para promover a distribución exterior e interior de bens e servizos culturais producidos por empresas vinculadas ás artes escénicas e ou musicais.