O Teatro Principal de Compostela acolle o vindeiro 26 de outubro a décima xeira de LGx15. O encontro de ideas para o futuro da lingua que organiza a Coordinadora de Traballadoras/es de Normalización Lingüística reúne unha vez máis, intervencións dun máximo de 15 minutos, "nas cales se transmitirán de forma visual e divertida ideas, argumentos e consellos para influír positivamente sobre o futuro do idioma".
Nesta xeira, participarán no encontro o mestre e dinamizador cultural Bernardo Penabade, quen falará desde a súa experiencia sobre a idea da estabilidade lingüística e a necesidade de mantermos o galego con as persoas de fóra. A actriz, narradora e dramaturga Sole Felloza "vén cambiar a perspectiva dos agradecementos na súa relación coa nosa lingua mediante a intervención titulada Onde cabe unha lingua caben dúas".
O guía de montaña José Manuel Menéndez, pola súa banda, tratará a relación entre as linguas e o medio natural, mentres as integrantes da produtora audiovisual Illa Bufarda explicarán as súas experiencias e filosofía de traballo en relación co idioma en Fauna, flora e lingua. Finalmente, o xornalista musical Rodri Míguez abordará a cuestión Onde está o teito da música en galego? e fará propostas para mellorar o seu coñecemento e consumo.
A educadora e narradora María da Pontragha conducirá a gala, que contará tamén cunha actuación de hip hop a cargo de Nadie González. A iniciativa conta coa colaboración da Secretaría Xeral da Lingua, o Concello de Santiago de Compostela, e Deleite e a Fundación Galicia Sustentable.
