Os Premios Alecrín recoñecen desde Cataluña a defensa da cultura galega

A artesá zoqueira Elena Ferro foi unha das galardoadas onte pola Federación de entidades culturais galegas de Cataluña (Fegalcat) cos seus premios Alecrín de Ouro. Cun acto en Ribadeo esta entidade fixo entrega dos seus galardóns cos que recoñece o traballo a prol da cultura galega por parte de persoas, empresas e entidades de diferentes ámbitos.

Outros doce premios entregáronse ademais do de Elena Ferro, que foi recoñecida no eido da artesanía. No relativo ao mundo da cultura a Coral Polifónica de Ribadeo, recibiu o Alecrín no Eido Musical; a Banda Municipal de Música de Ribadeo o recoñecemento pola súa Traxectoria; a asociación Amigos da Gaita Galega, o Alecrín no eido de Música Tradicional; o autor Serxio María Rodríguez por Investigación; Carmen Pérez, e o enxeñeiro de montes e escritor celanovés Xosé Benito Reza, pola defensa da natureza. Outros premios recoñeceron os eidos empresariais e deportivo.