A Associaçom Galega da Língua incorpórase á CPLP

O Conselho de Ministros da Comunidade dos Países de Língua Portuguesa, que se reuniu este 19 de xullo en São Tomé, aprobou incorporar unha nova entidade do noso país ao Conselho Consultivo desta entidade.

A Associaçom Galega da Língua (AGAL), histórica entidade do reintegracionismo galego, pasa deste xeito a formar parte deste organismo como Observador Consultivo.

A AGAL é a cuarta entidade galega en se incorporar a este organismo logo do Consello da Cultura Galega, a Academia Galega de Língua Portuguesa e a Associação de Docentes de Português na Galiza.

O estatus de Observador Consultivo permite ás entidades asociadas facer parte de xuntanzas temáticas da CPLP e da rede de colectivos vencellados, ademais de ter acceso prioritario a acordos co organismo internacional.