Pontevedra acolle a XII edición de Sete Falares

O espectáculo Tres vellas na romaría, protagonizado por Celso Fernández Sanmartín, Quico Cadaval e Guti, abre este 2 de xuño a duodécima edición de Sete Falares. O festival de narración oral de Pontevedra desenvólvese ata o vindeiro día 8 cun programa que conta coa presenza do arxentino Rodolfo Castro, do canario Ernesto Abad e do castelán-leonés José Luís Gutiérrez, Guti.

Como novidade nesta xeira destacan as dúas funcións de pago, a inaugural e a de clausura, a cargo de Cris de Caldas, Dois dos Montes (Vítor Fernandes e Estefânia Surreira), Rodolfo Castro, Ernesto Abad e Cándido Pazó.

Ademais, mantense o proxecto Rota de Historias, inaugurado en 2023, que aínda que de balde esixe retirada previa de entrada. Esta actividade levará o día 7 catro grupos de 50 persoas por puntos emblemáticos da cidade nun percorrido complementado coas historias de Pavís Pavós, Rodolfo Castro, Cris de Caldas, Dois dos Montes, Ernesto Abad e Cándido Pazó.

Actuacións de Atenea García, Dani Blanco e Cándido Pazó compoñen o programa dos días 3, 4 e 5. O 6 programaranse as propostas Tres eran tres... que reúne a Dois dos Montes con Rodolfo Castro e mais De dous en dous, un encontro do canario Ernesto Abad con Cándido Pazó. O día 8, ademais da gala de clausura, Rodolfo Castro actuará no Parador de Turismo e Os dois dos montes farano no Centro de Interpretación das Torres Arcebispais.