O vindeiro 3 de xuño alza o pano a undécima edición de Sete Falares. Quico Cadaval abre o festival de narración oral de Pontevedra que se desenvolve ata o día 11 coa Igrexa de Santa Clara como escenario.
Canda a Cadaval, o programa inclúe actuacións de Caxoto, Brais das Hortas, Ánxeles Goas, Carmen Conde, Adriano Reis, Pepito Mateo, Cristina Verbena, ou Victoria Siedleck, que actuarán tanto en solitario como cunha proposta a dúo e outra a combinar tres artistas.
Como novidade, o encontro desenvolverá o sábado 10 a actividade Rota de historias, na que se percorrerán en catro quendas lugares emblemáticos da cidade co acompañamento de historias de Adriano Reis, Cristina Verbena, Pepito Mateo, Quico Cadaval e Victoria Siedlecki. Os mesmos nomes encargaranse da gala de feche do festival, que se celebrará o domingo 11. Todas as actividades do programa están orientadas a público adulto.
