Continúan as publicacións arredor do Día das Letras Galegas que se lle dedica a Luísa Villalta, en particular aquelas dedicadas ao público infantil e xuvenil. Neste campo, a editorial Galaxia ten nas librarías O violino de Luísa, unha obra de Verónica Santalices con ilustracións de Lara Méndez que parte da figura da poeta para narrar un conto no que A Coruña perde a música e a poesía e a protagonista vive unha aventura para recuperalas.
En paralelo a esta proposta, o dúo Oviravai artellou un espectáculo poético musical co mesmo título que achegará a figura de Villalta ao público máis novo. Verónica Santalices e Federico Wellicki percorren mediante cancións a figura da homenaxeada e explican o significado do Día das Letras nesta montaxe.
Pola súa banda, a editorial Cumio acaba de presentar Sempre infinita. Eva Mejuto, con ilustracións de Bea Gregores, asina este volume que se presenta como "un álbum poético, un petisco da vida e obra de Luísa Villalta, narrada con palabras e imaxes desde as ondas do mar". O volume, de corenta páxinas e orientado a público a partir de oito anos, combina textos de Mejuto con "imaxes e palabras ás veces prestadas dos propios textos de Luísa Villalta".
