A coincidir coa celebración do Día Mundial do Teatro, este 27 de marzo, o Centro Dramático Galego celebra os seus 40 anos de existencia. O Salón Teatro, sede desta institución en Santiago de Compostela, acollía na mañá deste día 26 a presentación do programa de actos do aniversario. Unha xornada de portas abertas e visitas dramatizadas compoñen a proposta para esta efeméride.
As visitas dramatizadas desenvolveranse en catro quendas ao longo da xornada da man da compañía Galeatro e con Alba Bermúdez, Luma Gómez, Tone Martínez e Carlos Sante como guías. O percorrido amosará diferentes instalacións escénicas e dará a coñecer historias e anécdotas da institución. A actividade, con capacidade limitada a 12 prazas, terá lugar ás 18, 19, 20 e 21 horas, con reserva previa.
Ademais do programa local, o CDG anuncia que con ocasión do seu aniversario desenvolve "unha intensa programación que estende a súa actividade á produción e participación en 15 espectáculos e proxectos escénicos, a máis de 100 concellos de toda a Comunidade e á colaboración con entidades dunha decena de países en Europa e América".
Nesta quincena inclúense propostas xa estreadas como Hamlet, o de Cunqueiro e Míticas pero secundarias, dentro do ciclo Clásicas desfeitas coa Cidade da Cultura de Galicia, e Manuela Rey Is In Da House en colaboración co Teatro do Noroeste-Centro Dramático de Viana do Castelo, Teatro Nacional São João do Porto e Teatro Nacional D. Maria II de Lisboa.
Como vindeiras producións, o CDG anuncia Os actos e as profecías, que se estreará o vindeiro 11 de abril. Integrado no proxecto europeo Phōnē, Tamara Canosa dirixe este proxecto no que tamén asina a dramaturxia con Xacio Baño. Unha vintena de intérpretes subirán ao escenario nesta reflexións sobre os talent shows televisivos. Sobre esta mesma escenografía, no mesmo mes poderá verse o espectáculo de teatro comunitario O corazón na boca, con dirección de Rafael Rey e intérpretes de diferentes grupos da Federación Galega de Teatro Afeccionado.
En maio iniciará a súa andaina a proposta itinerante De Vilatriste a Vilalegre, en coprodución con Teatro O Cubo que percorrerá ao longo de catro meses un cento de concellos do noso país. Sofía Espiñeira e Roberto Casal Mouriño dixiren este proxecto que combina monicreques e traballo actoral.
Para o outono está prevista a anunciada reestrea de Terceiro acto. Esta obra dirixida por Andrea Jiménez e Noemi Rodríguez contará sobre as táboas con intérpretes que son historia viva do teatro galego como representantes da xeración que emprendeu a profesionalización do sector en Galicia.
En colaboración con Culturactiva presentarase Nada se sabe, creación colectiva baixo a dirección do madrileño Ignacio García, integrada no proxecto pedagóxico internacional NÓS/NOUS. O CDG tamén participará no espectáculo Na hora dos cans, con dramaturxia da galega Ana Carreira e dirección do portugués Nuno M. Cardoso.
Ademais, a entidade anunciou o seu apoio á iniciativa Territorios de liberdade, de Vazarim Teatro e Tanxarina Títeres, dirixida por Quico Cadaval con dramaturxia de Zé Paredes, á proposta de gran formato Frágua de amor, que adapta a obra de Gil Vicente e mais ao proxecto de coprodución e residencias Curtas-Entrepalav.bras entre Teatroensaio e Butacazero ou a programación en Galicia de As Quintas do Camões, en colaboración co Insituto Camões. A estes súmanse os espectáculos Fear Liath, "xunto a algúns dos principais teatros de Gales, Irlanda e Países Baixos", e Cores, co Teatro Nacional de Bautzen en Alemaña.
A repasar a historia da entidade, o conselleiro de Cultura, Román Rodríguez, lembrou que o Centro Dramático produciu ao longo da súa historia máis dun cento de espectáculos nos que participaron máis dun milleiro de profesionais do sector escénico.
