Tarabela Creativa estrea "Boa sorte, mala fama" este domingo en Lugo

En "Boa sorte, mala fama", trázase unha liña de paralelismos entre as andoriñas e a emigración. A compañía Tarabela Creativa estrea este domingo, 4 de febreiro, no Auditorio Gustavo Freire de Lugo esta traxicomedia escrita e dirixida por Carmen Conde que, tras dous anos de investigación, e recollida de historia reais en arquivos e en entrevistas, dálle unha nova visión á emigración galega, centrándose no rostro menos institucional. Marina Peña protagoniza a montaxe que tamén conta coa propia Carmen Conde como narradora e a música en vivo de Nastasia Zürcher.

"Boa sorte, mala fama" Trátase dunha traxicomedia en tres actos nos que facendo unha cartografía e un percorrido a través de diferentes épocas e persoas se contará a historia máis “incómoda” da nosa emigración. Empregando para isto tres disciplinas: a narración oral como fío condutor, a música ao vivo e na interpretación actoral Tres mulleres en escena para representar cada unha dende a súa disciplina o rostro menos institucional da emigración galega. Tras da estrea en Lugo, a montaxe poderá verse nos concellos da Pobra do Brollón, Taboada, Quiroga e Meira, e tamén, fóra da provincia de Lugo en Cedeira, Lalín ou As Pontes, entre outros sitios.