Memorias dun neno labrego chega á BD

A editorial Galaxia achega ás librarías neste final de xaneiro a primeira adaptación a banda deseñada da que se considera novela máis vendida das literatura galega. Iria Aldegunde leva aos cadriños Memorias dun neno labrego, de Xosé Neira Vilas, nun volume de 80 páxinas a toda cor.

A autora, graduada en Filoloxía Inglesa e formada na escola de BD O Garaxe Hermético abordou esta adaptación como un proxecto persoal arredor dun libro que ama. A obra pretende achegar a historia de Balbino a un público novo.

O guionista Fernando Llor, pola súa banda, acaba de presentar tamén a adaptación a banda deseñada dunha historia galega. Los sueños del lobo, con debuxos de Ismael Canales, leva á novena arte o caso de Manuel Blanco Romasanta, asasino en serie coñecido como o Lobishome de Allariz. Dolmen Editorial lanza a nivel estatal esta obra de 96 páxinas en branco e negro.

A coincidir con estes lanzamentos, Xerais presenta tamén un traballo saído da canteira do Garaxe Hermético. A colección Merlín Cómics acolle Os vagalumes de Marí, un volume de Alba Míguez e Damián Gómez que narra a historia dunha nena que se enfronta á avaría do faro da aldea xusto cando o seu pai navega de volta a casa. A obra, de 56 páxinas a toda cor, está orientada a público a partir de sete anos e foi finalista no premio de BD O Garaxe Hermético de 2023.