Doce fotografías do álbum familiar da autora, acompañadas doutros tantos textos das súas obras, compoñen o calendario en homenaxe a Luísa Villalta que acaba de publicar o Concello de Sada. A proposta, que abre as celebracións arredor da creadora homenaxeada no Día das Letras Galegas de 2024 conta cunha tiraxe de 1.500 exemplares que se poden recoller de balde no propio concello e na Oficina Municipal de Información Xuvenil.
Segundo sinala a corporación municipal, os textos seleccionados corresponden coas obras Música reservada (1991), Rota ao interior do ollo (1995), Ruído (1995), En Concreto (2004) e Papagaio (2006).
A familia da autora cedeu as fotografías para o proxecto, que contou coa colaboración da Real Academia Galega e do Centro Ramón Piñeiro para a Investigación en Humanidades, que ten a cesión do legado da autora.
