Despois de 8 edicións consecutivas e dun ano de pausa o concello de Allariz volve acoller o Poemagosto, o seu encontro coa poesía no outono, que inclúe ademais outras actividades. Estes vindeiros venres e sábado (6 e 7 de outubro) celebrarase a que será a novena edición deste festival poético, que con perspectiva internacional reúne a poetas de diversas orixes. Así, este ano estarán na vila alaricana as galegas Branca Trigo e Sara Plaza, o asturiano Xuan Bello, a escritora castelá Mª Ángeles Pérez López e a polaca Marta Eloy Cichocka. O programa inclúe varias actuacións musicais a cargo de artistas como Marta Bravo & Sérgio Tannus; Su Garrido Pombo; Diana Tarín & Héctor Lorenzo e as formacións Roña e Tor. Ademais haberá tamén un obradoiro de pandeiretas con materiais de refugallo, con Lorena Aula Cantarela e espectáculos de danza, rematando cunha foliada.
