O Festival dos Eidos achega a música e a palabra ao Courel

Poesía, música, danza, cine, fotografía e roteiros fan parte do programa do VIII Festival dos Eidos, que a Fundación Uxío Novoneyra organiza na súa sede en Parada do Courel entre o 25 e o 27 de agosto. A homenaxe ao poeta Carlos Oroza con ocasión do seu centenario preséntase como un dos puntos fortes do programa coa presenza de Antón Reixa.

Canda ao vigués, as actuacións poéticas previstas inclúen as accións poéticas Em torno da árvore, estendia-se o jardim nascente con Eva Valle, Nieves Neira Roca, María Grandío, María Corral Fernández e Beatriz Rodríguez Morales a integrar poesía, música e danza. Pola súa banda, A Faia de Ponto que reúne os poetas Alba Cid e Estevo Creus en diálogo co músico improvisador Xosé Miguélez, mentres João Barrento desenvolverá a proposta Nós herdámos as margens: Dos Eidos de Uxío ao rio da escrita de Llansol. Recitais de Chus Pato, Eva Veiga, Ana Romaní e Marina Oroza completan as propostas poéticas do evento.

No ámbito musical, o festival contará con actuacións de Radio Océano, Xackal, Rhome e Río Lagares. Segundo informou a organización este 22 de agosto, o recital de Os Resentidos, previsto para o día 25, será substituído por unha actuación de Ataque Escampe, logo de que a banda viguesa suspendese a súa actuación.

No ámbito audiovisual proxectarase o filme Zumiriki de Óscar Alegría, que manterá un diálogo sobre a súa obra co crítico Xosé Manuel Sande. Tamén se poderá ver a exposición fotográfica Onde só queda alguén pra aguantar dos nomes amosa os retratos que Federico G. Cabezón realizou a habitantes desta comarca nos anos 90. Unha ruta pola paisaxe sonora da contorna e outra de avistamento de aves completan as propostas do programa.