Unha novela gráfica de 192 páxinas a cor marca o debut da escritora Teresa Moure como guionista de banda deseñada. aCentral Folque publicou este mes de xullo Zeca Afonso. Balada do Desterro, obra que explora a biografía do coñecido cantor portugués desde unha perspectiva íntima. A portuguesa Maria João Worm corre coas ilustracións deste traballo, que sae á venda a un prezo de 30 euros.
A obra parte da suposta conversa entre o Zeca e a súa amiga Begónia Moa nun concerto celebrado en Galicia. A partir deste diálogo, Moure ficciona as preocupacións, dúbidas e procura de sentido de quen deviría un símbolo da Revolução dos Cravos desde a súa infancia en África ata a súa relación con Galicia. Moure realizou un intenso labor de documentación sobre o protagonista para desenvolver esta obra, aínda que aclara que se trata dunha obra de ficción.
