A oitava edición da SELIC apunta á internacionalización da cita coa lectura

Durante dez días, do 7 ao 16 de xuño, a compostelá Praza da Quintana acollerá unha vintena de expositoras (librarías, editoras e institucións) e desenvolveranse máis de 60 actividades, que porán o foco na lectura nunha nova edición, a oitava, do festival da lectura, SELIC. Presentada como a edición máis internacional de toda a historia do festival, o programa conta coa visita de figuras como o irlandés John Banville, a palestina Adanía Shibli ou o portugués João Tordo. Ademais coincidindo co aniversario da Revolución dos Cravos, ao fío do libro '50 anos de abril na Galiza', a SELIC contará con Manuel Durán Clemente, capitán da Revolución de Abril, que dialogará co profesor Roberto Samartim. Ademais, a escritora galega Teresa Moure e a ilustradora portuguesa Maria João Worm achegarán á singular e íntima visión que en 'Zeca Afonso. Balada do Desterro' fan do cantor portugués. No relativo á literatura do país haberá tamén unha boa representación da creación galega, con nomes como o Leo de Matamá, Afra Torrado, Fernández Naval, Eva Veiga ou Rosa Aneiros. Camilo Franco volve dirixir o vento organizado desde o Concello de Santiago de Compostela.

Un dos destaques deste ano será a celebración do cuadraxésimo aniversario da novela 'Crime en Compostela'. Gañadora da primeira edición do Premio Xerais, a novela de Carlos Reigosa considérase a obra fundacional do xénero policial na literatura galega. O Festival da Lectura rende homenaxe a este fito a través do seu cartel, no que aparece a pistola Star DKL do 9 curto, arma empregada para cometer o Crime en Compostela. Ademais, terá lugar unha mesa de debate arredor da importancia da obra, á que asistirán Fran Alonso, Xaquín Núñez Xabarís e o propio autor, Carlos Reigosa, así como dous paseos polos escenarios da novela e polos espazos do xénero negro na cidade, guiados polo escritor e crítico literario Mario Regueira. Estes dous paseos son parte das 12 andainas con diversas temáticas literarias para descubrir a cidade desde outra ollada que ofrece este ano a SELIC.

SELIC Criminal
Na liña de 'Crime en Compostela' e seguindo o camiño iniciado o pasado ano, a SELIC continúa coa súa vocación de reflexionar sobre o xénero negro coa súa sección Criminal, coordinada por Xaquín Núñez Sabarís. Nesta segunda edición, co obxectivo de integrarse na rede de festivais negros, a SELIC Criminal acolle un encontro festivais negros, con Javier Rivero (Tenerife Noir), Javier Sánchez Zapatero (Congreso de novela y cine negro de Salamanca) e Miguel Barrero (Semana Negra de Xixón. Ademais, varias mesas traerán a debate outras cuestións como os detectives de ficción, con Bieito Iglesias, Beto Luaces e Araceli Gonda; o cómic deste xénero, con Carlos Portela e Miguelanxo Prado; ou ata as tatuaxes criminais, da man de Servando Rocha. A SELIC Criminal tamén nos achegará ás obras de Rosa Ribas, Sara Vila ou João Tordo; os dous últimos incluídos no Clube de Lectura Criminal que se desenvolve paralelamente na Biblioteca Pública Anxel Casal de Santiago e na Biblioteca Lúcio Craveiro da Silva de Braga, que terá no Festival da Lectura o seu punto de encontro. Os relatos negros de todo o mundo serán os encargados de fechar a SELIC con Crime en carpaccio, un espectáculo de Simone Negrin.

Música, poesía e máis
Na súa teima de traer a lectura ao directo con formatos diferentes, que con frecuencia hibridan distintas disciplinas artísticas esta edición do Festival virá cargada de música grazas á visita do Leo de Matamá co seu 'Libre de libro', de F. X. Fernández Naval e Eva Veiga co 'Fragor do urdido' ou de Celso Sanmartín e Benxamín Otero con 'A cousa eterna'. A Fundación Carlos Casares traerá nas súas Coordenadas outros dous recitais: un con Ghaveta e Rexina Vega; e outro coas cegas de Ouselle acompañando a Santi Romay, que interpretará textos de Xesús Fraga. O programa xa está completo e dispoñible xunto