A Xunta seleccionará 10 proxectos musicais para exhibición no Focus Galicia 2023

O Womex, o evento profesional máis importante vinculado ás músicas de raíz no mundo, celebrarase na Coruña do 25 ao 29 de outubro. Pero como paso previo, a Xunta organizará o evento Focus Galicia en formato showcase, isto é, un programa con actuacións de 30 minutos en diferentes localizacións do territorio galego, destinado ao relevante conxunto de programadores que acode ao Womex. O Focus celebrarase entre o 22 e o 24 de xullo e o obxectivo é "brindarlle aos programadores de festivais e circuítos internacionais unha visión de conxunto sobre a creatividade do noso sector musical". Os grupos que queiran participar poden presentarse á convocatoria aberta en AGADIC.