O naufraxio do City of Agra volve lembrarse en Camariñas

As vilas de Camelle e Arou, do Concello de Camariñas na Costa da Morte, volverán lembrar este ano un dos naufraxios máis coñecidos da zona, o do City of Agra, acontecido fai 126 anos. Baixo o título "City of Agra. 16 anos na memoria" preséntase un programa de 3 días, entre o 7 e o 9 de xullo, que ofrecerá actividades de todo tipo, incluíndo representacións teatrais, concertos, unha exposición e actividades de homenaxe, ademais de outras lúdicas e gastronómicas. Este evento compartido por ambas localidades preséntase como o "meirande programa cultural dedicado a un naufraxio en Europa", unha denominación que fai dous anos só se restrinxía a Galicia.

O City of Agra partíu de Liverpool o 29 de xaneiro de 1897. Perdeu o rumbo a 35 millas de A Coruña por mor dunha densa néboa. O forte temporal fíxoo arribar ata embarrancar nos baixos do Conesudo, partíndose en dous. A bordo do barco ían 75 persoas 42 persoas sobreviviron ao naufraxio: 32 aloxados nas casas de Camelle, Camariñas e Arou e 10 salvados pola tripulación do vapor mercante británico Onega. Os veciños e veciñas de Arou e Camelle proporcionaron aos náufragos roupas, comidas, camas e prodigáronlle toda clase de atencións logo do desolador acontecemento. Nos días posteriores á traxedia déuselles sepultura a uns 29 corpos do City of Agra. A algúns dos mariñeiros agasalláronos pola súa valentía no rescate dos tripulantes, estendéndolles o goberno británico un premio que consistía nunha medalla na que se lía: "3 February 1897. For Gallantry and Humanity". As vítimas do suceso foron soterradas nos camposantos de Arou e Camelle. A produtora Vizuals Lab ten na rede o documental completo do naufraxio do 'City of Agra'. O documental permite a súa visualización completa, un modo con subtítulos ou tamén o acceso por temáticas concretas, xunto coa descarga de fichas e material documental. O proxecto foi elaborado coa colaboración da Deputación da Coruña

O programa inclúe varias recreacións dramatizadas do rescate e traslados dos náufragos, roteiros guiados, concertos (Belém Tajes e O pau que vira), dúas obras de teatro (Cas Eulogia e O bar do Chirivito) unha exposición propia sobre a historia do naufraxio e outras actividades de homenaxe ou lúdicas, incluíndo algúns eventos gastronómicos. En total tres días de programa continuo co aniversario deste naufraxio como centro e enfoque. O evento está organizado polo Concello de Camariñas e a Asociación Naufraxios Galegos, en colaboración coa Confraría de Pescadores de Camelle, a agrupación Mar Devalado, a Comisión de Festas de Camelle, Hijos de Rivera, e a Asociación Cultural Folia da Faneca de Camelle.