A música xa ten vendima para unha anada con marca propia

A música galega celebrou a súa festa en Pontevedra, unha celebración que tamén foi un importante aniversario, o décimo dos Premios Martín Códax da Música, convocados pola Asociación Músicas ao Vivo (MAV) e que contan co patrocinio das Bodegas Martín Códax. O dúo Vaguedades, formado polos actores Isabel Risco e Fran Rei, metéronse na pel duns hipotéticos e exultantes Rosalía de Castro e Eduardo Pondal que viaxan no tempo para conducir a Gala no Pazo da Cultura de Pontevedra, sempre co mundo do viño como base. O evento puido seguirse unicamente a través da canle de YouTube dos premios ao non contar con retransmisisón a través da canle pública da Televisión de Galicia. Quince premios a proxectos de outros tantos xéneros musicais, tres premios Organistrum e un ao artista emerxente do ano, así como o premio de Honra foron entregados sobre o escenario nesta décima edición do encontro aoq ue se chegaron a presentar case trescentos proxectos musicais de todo o país.

A entrega de premios abriuna o portugués Filipe Marta responsabel do programa SOS Metal da emisora Antena Minho, que entregou o Premio da categoría "metal e Heavy" á banda Arrhythmia. Os lucenses inauguraron a recollida de premios declarando o seu "amor infinito" á música. Su Garrdio Pombo foi a seguinte en recoller galardón na categoría de Canción de Autor. A viguesa reivindicou a resistencia na actividade musical,e agradeceu a actitude daquelas persoas responsble de programacións que non se deixan levar só polas propagandas e escollen "con criterio". O dúo de música electrónica Terrae, emulando aos Daft Punk, saíron a recoller o seu galardón, ataviados coas súas particulares máscaras de peliqueiros e manténdose en silencio mandaron a súa mensaxe por medio de Nastasia Zürcher como voceira. Nun ambiente festivo, como corresponde, fóronse sucedendo as entregas dos premios a proxectos musicais.

Na recollida do galardón á música de verbena, os representantes de La Oca Band lanzaron unha chamada ao resto das formacións de verbena do país, para que inclúan nos repertorios música en galego e música propia. O reparto final dos proxectos musicais resultou moi repartido en termos xeracionais, recoñecendo proxectos e artistas de longa traxectoria xunto con outras que están a dar os seus primeiros pasos con forza na escena musical do país. A cata dos quince premios, cos seus tres finalistas cada un , deixaron nas gorxas un pouso de variedade e calidade gorentoso entre o público asistente, entre o que se encontraba o Conselleiro de Cultura, Educación e Universidades, Román Rodríguez. O responsable da carteira cultural, ademais de ser interpelado nalgunhas ocasións desde o escenario para pedirlle un maior apoio á música galega, tamén saíu da gala co recoñecemento dado á plataforma Galician Tunes, de AGADIC, que recibiu o Premio Organistrum a mellor proxecto de Comunicación e Difusión Musical, recollido por Jacobo Sutil. Os outros galardóns desta categoría Organistrum foron para a Sala Rebullón de Tameiga (Pontevedra). O premio de festivais foi para a Foliada da Fonsagrada (Lugo).

Na comparecencia da Xunta Directiva da asociación MAV, a presidenta Sheyla Patricia, recordou que estes galardóns son "moi necesarios" para reivindicar o valor da música. Lembrou tamén que a asociación e a directiva está composta por "músicos en activo" e chamou a formar parte do colectivo polo valor asociativo que representan. A presidenta solicitou máis espazos para a música galega nas programacións de festivais e eventos e que o talento galego "estea no centro" para que as crianzas galegas poida ter referentes propios. A Gala rematou coa entrega, por parte do representante das Bodegas Martín Códax, do premio de Honra que este ano foi para a cantante Luz Casal, que acudiu a recoller o premio en persoa ao Pazo da Cultura. A artista de Boimorto pediu que, de servir ela de exemplo de algo, sexa de perseveración e loita, "eu levo toda a miña vida sendo unha loitadora. Porque cando amas a música non hai fronteira, non hai límite posible, custara máis pero se tes interese o conseguirás". Casal tamén recoñeceu a calidade e variedade da oferta musical do país qyue puido coñecer a través destes Premios, como a través do festival de La Luz.



Premiados na Xª edición dos Premios Martín Códax da Música Galega:

Metal e heavy: Arrhythmia

Canción de autora: Su Garrido Pombo

Electrónica: Terrae

Blues, funk e soul: Udra

Folk: Quico Comesaña e Grupo

Música tradicional: Ailá

Rock e punk: Moura

Pop e indie: Momboi

Música clásica e contemporánea: Mario G. Cortizo

Jazz e músicas improvisadas: David Regueiro Trío feat. Alexandre Cavaliere

Músicas do mundo e mestizaxe: Ton Risco e Marcos Teira

Músicas urbanas: Sila Lua

Música infantil: Pillaband

Orquestas, grupos e música de verbena: La Oca Band

Bandas de música popular: Banda de Música Cultural de Salceda de Caselas

Artista emerxente: Sergio de Miguel

Premios organistrum:

Salas: Rebullón

Festivais: Foliada da Fonsagrada

Comunicación e Difusión: Galician Tunes