Luz Casal premiada de honra nos 10º Premios Martín Códax da Música

A artista Luz Casal (Boimorto, 1958) será recoñecida este ano nos 10º Premios Martín Códax da Música de Galicia, co premio honorífico pola súa traxectoria. Segundo a asociación Músicas ao Vivo, organizadora dos galardóns, máis de corenta anos na música fan de Luz Casal unha das voces máis valoradas neste século na escena europea. A directiva de MAV sinala "a riqueza, delicadeza e inconformismo como intérprete e compositora" que caracterizan a traxectoria da artista. O premio entregarase na gala do vindeiro 7 de xuño no Pazo da Cultura de Pontevedra. Promovidos por Músicas ao Vivo, os galardóns contan co patrocinio das Bodegas Martín Códax, ademais do apoio do Concello de Pontevedra, Agadic-Xunta de Galicia e Deputación de Pontevedra. O pasado ano o Premio de Honra recaeu na formación Fuxan os Ventos.

"Cremos que é unha das voces representativas da nosa música, quizais non con música en galego pero si unha muller que sempre reivindicou o ser galega. Todo o mundo a coñece, sabe a súa traxectoria e como marcou unha época e un estilo. Ademais deixa moi bo sabor de boca saber que estamos a honrar esas mulleres ao mellor non foron tan recoñecidas no seu momento", sinala Sheila Patricia, presidenta de MAV sobre Luz Casal en declaracións a CulturaGalega. Vinte discos narran a historia musical da artista desde o seu primeiro traballo en 1982. Segundo glosan desde MAV, dende o primeiro momento no seu posicionamento na música a procura da profesionalidade é un obxectivo; quere o mellor, non só nela como solista, senón no conxunto de músicos, técnicos e produtores cos que vai traballar. En 1983 participa na xira 'El rock de una noche de verano', xunto a Leño e Miguel Ríos, todo un acontecemento socio-musical na España do momento, no que cada noite actuará en estadios ante milleiros de persoas. A rockeira Luz Casal completa o seu despegue. Afianza protagonismo na música pop-rock española durante a década dos oitenta e, a finais da mesma, publica o disco “Luz V”. Temas como 'Loca', 'Te dejé marchar' e "No me importa nada" marcarán o seu futuro musical e se integrarán no seu repertorio durante as décadas posteriores. Luz xa é unha solista moi popular, o seu público é masivo e o seu recoñecemento, unánime. Nese momento acepta a proposta de Pedro Almodóvar, que lle ofrece interpretar dúas cancións na súa película 'Tacones lejanos'. Un bolero de Agustín Lara, 'Piensa en mi', e a adaptación dunha canción de Mina, 'Un año de amor'. Dous temas gravados nun mesmo día; ela di que un dos momentos máis felices da súa vida. Esta banda sonora ofrecerá unha dimensión de Luz Casal non explorada que, entre outras consecuencias, abriralle as portas do éxito en Francia ata hoxe en día

Luz Casal e Galicia
O exposición de motivos que razoa a entrega deste premio inclúe a achega que Luz fixo á súa terra, entre outros creando o Festival de la Luz. En Andabao, Boimorto, no ano 2012, Casal levanta este festival de música. Un proxecto pensado para a diversidade de manifestacións musicais, prendendo o foco en iniciativas locais e con carácter benéfico. Así o estableceu ela para poñelo en marcha. As súas recadacións destínanse a organizacións como o Banco de Alimentos ou a Asociación Española Contra o Cancro, doenza que Luz Casal padeceu en dous episodios en 2007 e 2011, e en cuxa recuperación quedou de manifesto o inmenso afecto do que goza por parte do público. Tamén en Galicia, na compostelá Praza do Obradoiro, gravará en directo o disco Solo esta noche, en 2021, xunto á Real Filharmonía. Ademais a artista asinou xunto a Carlos Núñez a interpretación dunha adaptación do tema "negra sombra", no que o compositor Xoán Montes musicaba o poema de Rosalía de Castro e que acadou difusión internacional.
Desde Músicas ao Vivo, entidade organizadora dos Premios Martín Códax da Música, destacan non só o seu éxito en relación ao público que a segue desde hai décadas senón tamén "unha maneira de construír a súa carreira que é un paradigma para a comunidade artística". Luz Casal está vivindo un ano pleno para a súa carreira, cunha xira de concertos esgotados en España e Francia, e con novo disco: "Las ventanas de mi alma". O primeiro sinxelo do disco, lanzado en xaneiro, recollía a experiencia de Luz Casal que, durante o confinamento pola COVID-19 en 2020, conversou por teléfono con persoas que compartían o seu estado de ánimo coa artista. Realizou máis de dúas mil chamadas entre marzo e maio de 2020.

A relación de proxectos finalistas dos Martín Códax, que se desvelaba o pasado 10 de maio, ofrecen unha ampla perspectiva do panorama musical galego na actualidade. A votación está aberta aos socios e socias de Músicas ao Vivo ata o 4 de xuño. Tamén para o público xeral, que pode votar na categoría de Artista Emerxente a través da páxina web dos Premios (premiosmartincodaxdamusica.gal). Nesta categoría os proxectos finalistas son Fillas de Cassandra, Sergio de Miguel e Lontreira.