Os Premios Martín Códax abren as súas votacións ao público

A Sala Sónar, en Santiago de Compostela, acollía este 14 de febreiro a presentación da XI xeira dos Premios Martín Códax da Música. A presidenta da Asociación Músicas ao Vivo, Sheila Patricia, e mais o vicepresidente Xavier Castro daban a coñecer o detalles dunha edición na que, por vez primeira, o público poderá votar os proxectos gañadores de cada unha das quince categorías a concurso.

Segundo explicaron as representantes de Músicas ao Vivo, "a intención é abrir o proceso ao público xeral e aumentar a participación efectiva no certame, sen perder a lexitimidade que achega o voto das propias compañeiras asociadas". Así, "para o reconto final, o público sumará as súas escollas en 2024 ás feitas polas socias e socios de Músicas ao Vivo".

Deste xeito, un xurado profesional encargarase da selección de tres finalistas por estilo, entre os cales se escollerán as propostas vencedoras mediante votación. A organización dos premios explica que para votar será necesario valorar mediante un sistema de puntos as categorías dun mínimo de cinco categorías e validar a votación, única por cada usuario. No reconto final de votos, cunha regra de baremación, o 50% corresponderá á votación do público e o outro 50% aos votos dos socios e socias de Músicas ao Vivo.

A nova edición dos galardóns mantén as categorías da anterior edición, así como os premios Organistrum para salas, medios de comunicación e festivais, canda ao galardón de Artista Emerxente, creado en 2022. Este último recoñecerá un proxecto inscrito nalgunha das outras categorías que non leve en activo máis de tres anos, que non editara máis de un disco (EP ou album) e que non fora premiado nin finalista en anteriores edicións dos premios.

O período de inscricións para a nova edición estará aberto entre o 19 de febreiro e o 10 de marzo, e a gala de entrega celebrarase o 15 de maio no Pazo da Cultura de Pontevedra.