O pontevedrés Ánxel Carramal Fernández, nado en 1994, impúxose na cuarta edición do Premio O Garaxe Hermético de Banda Deseñada. O caderno de rama, foi a obra que seleccionou o xurado como vencedora e que será publicada por Edicións Xerais no vindeiro mes de maio.
Segundo explica o fallo, "a obra trata a guerra dende o punto de vista dun neno que, ante a barbarie e a destrución, atopa na creatividade e no debuxo o seu maior aliado". O xurado destaca que "a composición de páxina, dinámica e expresiva, así como o uso da narrativa da cor e as escenas de compoñente lírica e poética" que desenvolve o autor.
O xurado estivo composto por Kiko da Silva, Fernando Llorente e Miguel Porto, en representación do Garaxe Hermético, e por Anaír Rodríguez e Fran Alonso, en representación de Xerais, as dúas entidades que organizan o certame. O comité destacou a alta calidade dos traballos presentados, en particular dos dous traballos declarados finalistas, Os vagalumes de Mari e Maia e a troita perlada.
