Campás da Catedral de Santiago. Fonte: Campaneiros de Galicia.
A Asociación Campaneiros de Galicia quere celebrar o recoñecemento que este mesmo mes de decembro fixo UNESCO do toque tradicional de campás como Patrimonio Inmaterial da Humanidade. Para isto, os vindeiros días 30 e 31 de decembro dúas sesións farán soar de novo as campás da Catedral de Santiago de Compostela de xeito tradicional.
En concreto, o día trinta as dezasete pezas activas do templo soarán ás 11 da mañá durante vinte minutos para conmemorar a Translación do Apóstolo. Na seguinte xornada acompañarán a cerimonia de feche da Porta Santa ás 16:30 horas.
A Asociación Campaneiros de Galicia, creada neste mesmo 2022, quere reivindicar con esta iniciativa o toque manual de campás, en particular en templos como a Catedral de Santiago onde o tanxido leva decenios automatizado.
