Javier Rodríguez González gaña o XIV Premio de Poesía Victoriano Taibo

O xurado do XIV premio de Poesía Victoriano Taibo, resolveu por maioría que o libro gañador desta XIV edición sexa o presentado co título 'Xeración (Breve tratado de males inespecíficos)' que, unha vez aberta a plica, resultou ser da autoría de Javier Rodríguez González (Ourense, 1983). O xurado do premio organizado desde o Istituto de Estudos Miñoráns, integrado polas escritoras Marica Campo, Oriana Méndez e Arancha Nogueira, gañadora da edición anterior; Marcos Calveiro, en nome da Editorial Galaxia e Miguel Anxo Mouriño, en nome do IEM, valora que a obra "constitúe a crónica dunha xeración que se transcende a si mesma, chegando a expresar un auténtico manifesto contra a cultura da cancelación na medida en que a memoria, tamén a recente, marca o momento actual e proxéctase nun diálogo cara ao futuro". Segundo eles o poemario contén un alto interese histórico-cultural, "ao mesmo tempo que se expresa cun léxico depurado e un ritmo áxil, ofrecendo unha proposta poética do devalar da existencia".

Javier Rodríguez González é licenciado en Filoloxía Hispánica pola Universidade de Santiago de Compostela e diplomado en Ciencias Relixiosas pola Universidade Pontificia de Salamanca. Funcionario de carreira, traballa desde hai anos como profesor de Ensino Secundario no IES Mariano Quintanilla (Segovia). En galego ten gañado premios como o VII Certame Literario Concello de Ames (2010), o XXVI Certame de Poesía Feliciano Rolán (2012), o VI Certame Literario Terras de Chamoso (2013), o Certame a Pipa Alta Montaña Luguesa (2013), VII Certame de Poesia Manuel Leiras Pulpeiro (2019), III Premio de Poesía Eduardo Pondal (2021), e o V Premio de Poesia Eloy Lozano (2021). O Premio de Poesía Victoriano Taibo que convoca o Instituto de Estudos Miñoráns en colaboración co Concello de Gondomar e coa Editorial Galaxia, ten unha dotación de 4.000 euros e supón a publicación da obra na colección Dombate da Editorial Galaxia. Gañar este premio supón tamén a obriga de impartir un obradoiro totalmente presencial de poesía en Gondomar entre os meses xaneiro e marzo de 2023. O acto de entrega do premio e a presentación do libro, editado por Galaxia, terá lugar no mes de marzo de 2023, nunha data aínda por confirmar, pero que será arredor do día 13, cabodano do pasamento do poeta Victoriano Taibo.