Alberte Ansede. Fonte: Fundación Manuel María.
O padroado da Fundación Manuel María de Estudos Galegos escolleu de xeito unánime a Alberte Ansede como novo presidente da entidade. Ansede, que ocupaba a secretaría da entidade desde a súa posta en marcha en 2007, sucede no cargo a Saleta Goi, viúva do escritor e promotora da fundación que faleceu no pasado mes de setembro.
Ansede, segundo explica a fundación, "mantivo desde a súa mocidade unha intensa relación con Manuel María e Saleta, relación que se converteu en íntima amizade unha vez que o matrimonio se trasladou a vivir á cidade da Coruña". Antón Laxe, ata o momento responsable da Casa-Museo Manuel María en Outeiro de Rei será o novo secretario da entidade.
Segundo declarou o novo presidente, "a miña pretensión non é tanto suplir a Saleta -algo completamente imposíbel- senón contribuír como Presidente a fortalecer a dinámica deste colectivo, única garantía de que a obra de Manuel María siga presente na sociedade galega" e anuncia a intención de consolidar as iniciativas que xa ten en marcha a fundación.
