O Museo de Pontevedra é unha das sedes da Bienal de Arte de Cerveira

Unha selección de obras de quince artistas de Portugal e de Brasil compoñen a exposición da Bienal Internacional de Arte de Vilanova de Cerveira que abre as súas portas este 22 de setembro na sede do Museo de Pontevedra. A Bienal, que se desenvolve baixo o lema We must take action! " quer agir e colocar a Arte e os artistas a pensar o mundo e as emergências globais que a todos afetam", segundo sinala a organización do evento.

O centro, que se integra así como un dos polos expositivos do evento portugués, acolle unha selección de pezas que amosan artistas de Portugal e de Brasil de "diferentes xeracións e plasticidades, que comparten o gusto polo detalle, polo deseño, pola expresión do corpo, con enfoque na dimensión poética da obra de arte e nas mensaxes indecibles que agocha", segundo explica a presentación do proxecto. A directora artística da bienal, Helena Mendes Pereira, correu coa selección das obras que se poden ver no centro ata o vindeiro 11 de novembro.

Nomes de referencia na arte portuguesa como Zulmiro de Carvalho, Ana Vidigal ou Mafalda Santos, canda a creadoras e creadores lusos de diferentes xeracións coma Elsa César, Ana Maria Pintora, Henrique do Vale, Juan Domingues, Mariana Mizarela, Pedro Figueiredo, Serafim Sousa e Sobral Centeno. Jayme Reis e Zélia Mendonça poñen o quiñón brasileiro na mostra, que se completa con dúas obras inseridas na homenaxe que a bienal dedica á pintora Helena Almeida, e que asinan Ana Monteiro e Maria Cunha.

En paralelo a esta exposición, o día 22 abre tamén as súas portas en Monção outra exposición da Bienal na que participa o pintor de Marín Antón Sobral.