O Salón Teatro de Compostela acolle a coprodución internacional Tartufo

Con tres funcións de balde entre os días sete e nove de xullo chega ao compostelán Salón Teatro a coprodución internacional Tartufo. A montaxe, dirixida polo portugués Tónan Quito, conta coa presenza actoral galega de Marcos Fernández e Yaiza Portela, a escenografía de María Torres Piñeiro e a asistencia de dirección de Diego Chamizo Mora. En total o equipo está formado por dezaseis estudantes de último curso de catro escolas de arte dramática diferentes.

O texto clásico de Moliére poderá verse en tres funcións de balde entre os días 7 e 9 de xullo, co texto orixinal en francés e en verso rimado, con subtítulos da tradución ao galego e en prosa de Loli Ramos Duarte.

A obra desenvolveuse no marco do Proxecto NÓS/NOUS, que desenvolve un intercambio entre catro compañías públicas e outros tantos centros de ensino de arte dramática de Francia, Portugal e Galicia. Entre os seus obxectivos está promover "tanto a profesionalización como a internacionalización de estudantes no treito final do seu período académico, ao poñelos en contacto con figuras consolidadas do sector teatral". A iniciativa conta co financiamento do programa europeo Erasmus+K2, a través da Escola Superior de Arte Dramática de Galicia e do Centro Dramático Galego.