A Regueifa 2.0 crea as 'Miudiño Sessions'

A plataforma de difusión e selo dixital A Regueifa 2.0 segue a presentar proxectos musicais desde a súa reactivación. Un dos máis recentes son as Miudiño Sessions, que veñen de inaugurar cun vídeo de HOLGADO, o proxecto de Keko Ponte. Segundo eles mesmos explican, este proxecto faise seguindo o ronsel dos concertos para levar de La Blogotheque, os Tiny Desk Concerts da radio pública norteamericana ou os pioneiros acústicos da MTV dos 90s. A Regueifa 2.0 estrea estas sesións gravadas en directo, unha serie de microconcertos de grupos e solistas en formato mínimo gravados en localizacións singulares e poñendo o foco tanto no visual -toda a serie estará filmada en 4K- coma no musical -procurando unha calidade de son semellante á gravación en estudo- o proxecto estrease co barcalés HOLGADO, interpretando ao pé do cruceiro de Gonte na súa Negreira natal tres temas de "O fillo de Suso", o seu novo álbum. Acompañado ao saxo e ao caixón por Daniel e Diego Vieito, Holgado debulla as lembranzas desa infancia rural que se extingue irremediablemente interpretando "A piscina", "Herba seca nas brañas" e "Notas do funeral de Ricardo Vieito". Agárdense vindeiras entregas destas coidadas sesións musicais por máis artistas da plataforma.