Imaxe do Festiletras para o 17 de maio
A manter a súa celebración en setembro, onde se trasladou en 2020 pola pandemia, o Festiletras Da Fundación Eduardo Pondal adianta os contidos da súa vindeira edición, que será a do corenta aniversario, na aldea do Couto, Ponteceso. Este primeiro de abril a organización daba a coñecer os actos que se manteñen para celebrar o Día das Letras Galegas, data que motivou a creación deste evento, co título de O dezasete.
Deste xeito, as propostas comezarán xa no día 14 cunha excursión a Muxía na que os investigadores Manuel Ferreiro, Felipe Senén e Félix Neira falarán sobre a obra de Eduardo Pondal nunha xornada que rematará cun contacontos de Boniface Ofogo. Para o 15, o programa inclúe a entrega dos Premios Bos e Xenerosos e a apertura dunha exposición fotográfica sobre as catro décadas desta celebración.
O día 16 será a quenda do teatro con A Peregrinaxe de Badius e no propio Día das Letras haberá un percorrido polas placas dos escritores situados na aldea do Couto, un recital poético a cargo de Rosalía Fernández, Suso Lista, Claudia Castro, Alexandre Nerium e Xurxo Souto e a música de Faia Díaz.
Logo deste aperitivo, o programa do Festiletras en si desenvolverase entre os días 1 de 4 de setembro, e nos primeiros nomes confirmados para o evento están Xabier Díaz, Rodrigo Cuevas, The Rapants e Carlangas DJ Set.
