Premio ao Mellor guión televisivo para a segunda temporada de 'Hierro'

A serie 'Hierro' da produtora Portocabo para Movistar+ ven de servir de novo para o recoñecemento do talento galego no audiovisual estatal. Ademais dos numerosos premios a nivel estatal e galego que a produción leva recollidos coa súa primeira temporada nos pasados anos, agora o Festival MiM, dedicado á ficción televisiva estatal, ven de outorgarlle o premio de Mellor Guión ao equipo de cinco guionistas galegos que elaboran a base da súa historia na segunda temporada. Pepe Coira, Lidia Fraga, Fran Araujo, Araceli Gonda e Eligio Rodríguez conforman o equipo gañador do premio outorgado no festival organizado pola asociación Madridimagen co apoio de Dama, entidade de xestión de dereitos de autoría nos medios audiovisuais.

'Hierro' aumenta así o seu palmarés, cando xa vai pola súa segunda temporada, que é finalista tamén nos XX Premios Mestre Mateo nas categorías de Mellor Serie de Televisión, Mellor Dirección (Jorge Coira), Mellor Dirección de Produción (Ana Míguez), Mellor Montaxe (Jorge Coira, Gaspar Broullón, Juan Galiñanes); Mellor Música orixinal (Elba Fernández, Xavi Font); Mellor Son (Juan Gay, Diego Staub); mellor Vestiario (Alicia Dapena, Lola Dapena) e na de Mellor Guión para o queipo agora premiado. No ano 2020 a serie saíu da XVIII edición dos premios do audiovisual galego con catro meritorios galardóns, algúns deles nos que repite este ano: o premio a Mellor Serie de Televisión, ademais de Mellor Dirección de Produción para Ana Míguez, Mellor Guión para Pepe Coira, Fran Araújo, Araceli Gonda, Coral Cruz e Carlos Portela e Mellor Música Orixinal para as composicións de Elba Fernández e Xavi Font.