Só Nordés mantén a presenza galega en ARCO

Justmad e Art Madrid concentran o interese das galerías de arte do país nas feiras madrileñas

Justmad e Art Madrid concentran o interese das galerías de arte do país nas feiras madrileñas
A galería compostelá Nordés é a unica galega que participa da nova edición de ARCO. A Feira de Arte Contemporánea de referencia a nivel estatal abre as súas portas este 23 de febreiro en Madrid cunha diminución na presenza do noso país. Obras de Julia Huete, Rubén Santiago, Rosendo Cid, Miguel Marina e Luísa Pastor compoñen a oferta de Nordés nesta nova edición.

Canda a esta galería, o evento acolle propostas editoriais galegas como a viguesa FAW, Bartlebooth (Lugo-Madrid), e os coruñeses Laboratorio Creativo Vilaseco e a Fundación María José Jove, que presenta un libro sobre o oleoducto da cidade a partir da investigación fotográfica que realizou Damián Uceda.

Justmad
Conseguen un maior interese dos centros de arte galegos as citas paralelas á grande feira. Justmad, que se celebra entre os días 24 e 27, contará deste xeito coa presenza da ourensá Marisa Marimón, que levará traballos de Pablo Castañeda, Tamara Feijoo e Antonio Guerra. Desde Compostela chegan Trinta, con obras de Cesc Abad, Carmen Calvo, Francisco Mendes Moreira e Juana González e mais Metro, que amosa o labor de Carmen Pastrana, Sebas Anxo, Paula Vicenti, Suso Basterrechea e Federico Granell. A elas súmase desde Boiro a Galería Ladoce, que achegará ao evento obras de Abi Castillo e David Fidalgo Omil.

Art Madrid
Art Madrid, pola súa banda, reunirá entre os días 23 e 27 o espazo compostelán Luísa Pita con traballos de David Planas, Fernando Suárez Reguera, Juan Adrio, Julio Bauzá, Marisa Cruz e Pierre Louis Geldenhuys e mais a coruñesa Moret Art. Esta última amosa na cita a arte de Daniel Sueiras, Iván Prieto, Lino Lago, María Treviño, Miguel Piñeiro, Toya García Senra e Xurxo Gómez-Chao. Canda a elas, estará presente no evento o galego Víctor López Rúa nas filas da Galería Hispánica Contemporánea.

Salón de Arte Moderna
A viguesa Galería Montenegro pola súa banda, optou polo Salón de Arte Moderna, que abriu as súas portas o día 22, para participar das feiras madrileñas deste ano cunha nutrida selección de artistas.