Retrato de Jaime Mateo no seu proxecto Khaimi
Con 41 anos morría este domingo en Ourense, vítima dun infarto, o músico Jaime Mateo. O seu falecemento inesperado causou sorpresa e dor no mundo da cultura de Ourense e entre a tribo musical galega. Mateo formaba parte do coñecido grupo Os Amigos dos Músicos, onde era vocalista e batería, ademais de na banda O Sonoro Maxín. Activo integrante do tecido cultural da súa cidade tomou parte tamén en outros proxectos musicais como colaborador (MounQup, Las Cruzes, Druso, etc.) ou en proxectos propios como Khaimi, ademais de manter un espazo radiofónico e sesións de Dj. O xornal La Región sinalouno no seu obituario coma un "referente para a cultura ourensá". Nas redes xa foron varios os músicos que deitaron a súa tristura polo pasamento, coma Guadi Galego ou Marcos Maril, entre outros.
