Inauguración do Camiño Real de Moaña a Cangas. Fonte: Deputación de Pontevedra
O proxecto de recuperación do Camiño Real entre Moaña e Cangas como vía peonil e ciclable é xa unha realidade. A presidenta da Deputación de Pontevedra, Carmela Silva, inauguraba este 4 de agosto esta vía, que recupera o trazado da antiga vía que conectaba as dúas localidades no que é o maior espazo adaptado para peóns e bicicletas do país, con 5,3 quilómetros de lonxitude.
O investimento de 575.000 euros que realizou a entidade provincial incluíu, canda á sinalización e adaptación da vía "a creación de prazas e espazos de lecer e novo mobiliario urbano como bancos, fontes, papeleiras, pérgolas e aparcadoiros para bicicletas". O proxecto foi concibido "con perspectiva de xénero, dende a atención á infancia e para a integración dos colectivos con diversidades funcionais".
