O Premio Arume recoñece a Ramón D. Veiga e a Manuel López Rodríguez

O xurado do Premio Arume de Poesía para a Infancia acordou nesta edición outorgarlle o galardón a dous autores. Plarapluie, de Ramón D. Veiga e mais A for da letra de Manuel López Rodríguez son os traballos recoñecidos nesta edición, que repartirán os mil euros en metálico do premio e serán publicados pola editorial Embora. O premio retomou neste 2021 a súa actividade, logo de cesar en 2015, como unha iniciativa conxunta entre a Fundación Xosé Neira Vilas, que o promovera orixinalmente, a Asociación Galega do Libro Infantil e Xuvenil (Gálix) e mais a empresa Deleite.

O comité de selección do premio estivo composto por Xosé Antonio Perozo, Presidente de GALIX, Rosalía Morlán, Secretaria da Fundación Neira Vilas, María Xesús Fernández, Manuel Figueiras e Pilar Sampedro. Segundo apunta o fallo, Plarapluie, é "un libro divertido e provocador no que se busca a risa pola extravagancia e a complicidade cos pequenos lectores e lectoras. Unha linguaxe áxil e de calidade, na que os recursos poéticos están moi ben empregados a sonoridade envolve os versos". A for da letra pola súa banda "constitúe unha singular homenaxe á poesía establecendo un diálogo con poetas relevantes da nosa literatura. O ritmo introdúcenos nunha proposta unitaria, cunha rica linguaxe conceptual e variados recursos que nos conducen á oralidade e participación coral".