'NACIÓN' e 'Olvido y León' chegan hoxe aos espazos de exhibición das vilas e cidades

A fin de semana chega cargada para os amantes da cinematografía coa apertura das salas de cine que ían faltando na comunidade e a estrea comercial de dúas producións galegas: NACIÓN e Olvido y León. NACIÓN, o último filme de Margarita Ledo Andión, estreado no pasado Festival de Sevilla, onde foi galardoado co Premio á Mellor Dirección dun Filme Español, estará desde hoxe dispoñible e oito salas de outras tantas localidades galegas e cinco salas máis entre Madrid (Golem), Lleida (Screenbox) e Barcelona (Zumzeig, Cinebaix e Cinemes Girona). En Galicia será posible vela desde hoxe nos cines Cantones (A Coruña), Avenida (Caldas), Dúplex (Ferrol), Códex (Lugo), Seixa (Marín), Galicine Cinexpo (Pontevedra), Numax (Santiago) e Gran Vïa (Vigo). Margarita Ledo Andión ofrece unha pescuda inspiradora sobre as mulleres galegas na segunda metade do século XX. Recuperando a historia da fábrica Pontesa, intercalando con habilidade exquisita imaxes de arquivo, testemuñas, reconstrucións ficcionadas e elementos da cultura popular, o filme é unha homenaxe a todas as mulleres que converteron a fábrica nun referente para a reivindicación dos dereitos das mulleres.

Ata en 24 salas de todo o Estado estrearase hoxe comercialmente Olvido y León, a película dirixida por Xabier Bermúdez como secuela da anterior León y Olvido (Xabier Bermúdez, 2004). Repiten na historia as mesmas personaxes, de novo interpretadas por Marta Larralde e o falecido Guillem Jiménez e engádese tamén Monti Castiñeiras. Esta historia inaugurou a pasada edición do OUFF xa que foi gravada en terras ourensás. A acción transcorre quince anos tras da primeira, en Olvido y León coñecemos a evolución da vida destes dous irmáns e onde están na actualidade. A sinopse oficial da película conta que "Despois de quince anos, Olvido aceptou que o seu mal non é o seu irmán xemelgo, León, que ten a síndrome Down. Podería abandonalo pero aceptou que o seu mal son poderes que non coñece e non identifica ben, pero que sente que hai. Poderes que tecen como unha araña un cárcere de insatisfacción social e persoal". Oito cines galegos de sete localidades acollen desde hoxe en estrea a película: Cantones e Yelmo Los Rosales (A Coruña); Multicines Bergantiños (Carballo); Odeón Multicines (Narón); Ponte Vella (Ourense); Yelmo (Vigo); Cinexpo (Pontevedra); Multicines Gran Arousa (Vilagarcía).