Galicia a través dos ollos dun alemán

Entre 1929 e 1936, o fotógrafo aleman Otto Wunderlich visitou Galicia coa finalidade de retratar as paisaxes e monumentos do país. Agora, a fototeca do Instituto do Patrimonio Cultural de España renovou o seu buscador, facilitando a consulta dos seus fondos gráficos e facilitando a visualización das fotografías. O IPCE conserva 452 rexistros fotográficos realizados por Wunderlich en Galicia. O seu traballo focalizouse sobre todo nas Rías Baixas (Pontevedra, Vigo e proximidades), así como en Santiago de Compostela, con pequenas incursións ao interior, coma o Ribeiro. Presentamos unha escolma de dezasete fotografías que son un excelente punto de partida para explorar estas coleccións, e para comprobar o impacto do paso do tempo nas paisaxes e nos monumentos galegos.