Unha guía para entender o urbanismo histórico das vilas galegas

José González-Cebrián Tello e Miguel Ferreira Villar foron os redactores da publicación A paisaxe no tempo. Marco urbano e ambiental dos núcleos históricos menores en Galicia, que edita o Instituto de Estudos do Territorio da Consellería de Medio Ambiente. A publicación amosa a través de ilustracións, mapas e fotografías, as "características morfolóxicas dos núcleos históricos menores de Galicia", comparando o seu punto de partida histórico e a súa configuración actual. O enfoque, estritamente urbanístico, non se detén en aspectos históricos ou económicos, senón no papel determinante da xeografía. A publicación permite coñecer a estrutura de localidades como Betanzos, Corcubión, Fisterra, Muros, Noia, Padrón, Mondoñedo, Ribadeo, Samos, Allariz, Castro Caldelas, Celanova ou Cambados e Tui, ata un total de trinta vilas e pequenas cidades.