Falece Xosé Manuel Pazos Varela, promotor da Mostra de Teatro de Cangas

O falecemento de Xosé Manuel Pazos Varela na tarde deste 25 de xaneiro aos 63 anos de idade está a espertar múltilpes signos de pesar no sector escénico galego. Pazos, que na actualidade era alcalde de Cangas, desenvolveu ao longo da súa vinda un intenso labor no campo do teatro. Desde a fundación de Teatro de Ningures, onde traballou como actor, produtor ou dramaturgo, ata o seu papel fundamental como impulsor e director da Mostra Internacional de Teatro Cómico e Festivo de Cangas, desenvolveu todo tipo de labores no ámbito das táboas, a incluír a tradución, a adaptación ou o impulso do teatro afeccionado.

Como dramaturgo destacan na súa carreira obras como Laídos para despois dunha guerra, Desembarco dos turcos, Crónica da peste, María Soliña, ou Ida e volta. Co espectáculo Emigrados que asinou con Cándido Pazó, Suso de Toro, Anxos Sumai e Sonia Delgado recibiu o Premio Max ao Mellor Autor Teatral en Galego.