Un encontro en liña na tarde desde 18 de decembro bota a andar as actividades da Rede Iberoamericana de Arte Urbana, acabada de nacer. A entidade, impulsada pola galega 7H Cooperativa Cultural conta con Asalto Proyectos Culturales (Zaragoza), Fundación Contorno Urbano (Barcelona), Madrid Street Art Project (Madrid), Mistaker Maker (Lisboa) e Parees Fest (Oviedo), "aspira a construír un espazo aberto de diálogo e reflexión transformadora que inflúa tanto nos modelos de xestión privados como nas políticas públicas culturais que inciden no sector".
Este primeiro encontro abordará en tres relatorios as cuestións da profesionalización e boas prácticas arredor deste ámbito creativo, a igualdade de xénero e mais a relación de periferia e arte contextual. A partir desta e das vindeiras xornadas a Rede pretende elaborar unha Guía de Boas Prácticas na Organización de Festivais de Arte Urbana. Segundo sinalan desde 7H "o documento, aínda inexistente no sector, é considerado polas entidades promotoras como unha condición imprescindíbel para conseguir xerar emprego sustentábel e de calidade". 7H é reponsable da organización do Delas Fest e mais do Laboratorio de Arte Urbana.
