Catorce entidades da Coruña repartirán os 800.000 euros da V Convocatoria Cultura Accesible e Inclusiva que organiza a Fundación Emalcsa con Vegalsa-Eroski e a Fundación María José Jove. Segundo sinalou a alcaldesa da cidade, Inés Rey, na presentación desta liña de axudas, os fondos apoiarán "proxectos inclusivos de entidades con traxectoria e experiencia no eido da cultura, e para seguir sobre todo dándolle protagonismo á cultura como ferramenta transformadora que nos fai a todos medrar como sociedade".
Poten100mos, Asociación Participa para a Inclusión Social, Amigos do Museo de Belas Artes, Asociación Cultural 3x4, Asociación Cultural Coruñesa Negus, Viraventos, Ese8, Asociación Cultural para a Integración Social Viraventos, Asociación Cultural Zalaeta, Mundo Sen Guerra e Sen Violencia, Sociedade Filatélica da Coruña, Demusicade2, Asociación Socio-cultural Acampa e Ampa Zalaeta Campo da Leña son as beneficiarias desta convocatoria.
A coincidir coa presentación, este 11 de decembro comeza na cidade o IX Encontro Artes pola Integración. Ata o vindeiro 13 o programa achega propostas de danza e flamenco inclusivos, mesas redondas e mais exposicións fotográficas e audiovisuais. Carlota Pérez, a Compañía José Galán, Nuria Sotelo ou a Compañía 5s fan parte das propostas, ás que se pode asistir de balde con reserva previa.
