As antigas radionovelas hoxe son podcasts. E non é frecuente que obras da literatura galega trascendan do formato impreso á narración sonora da radio. Entre o 15 e o 30 de decembro Radio Fene Radiofusión emitirá os 13 episodios nos que foi dividida a novela Un home estraño, publicada por Antonio Tizón en 2018 e agora tamén adaptada por el. Con ela, Tizón gañou o VI Premio Cidade Centenaria de Ribeira. Trátase dunha novela negra ambientada en 1980, na que o inspector Xosé Sánchez Pereiro, protagonista das novelas negras de Tizón, investiga a morte dun arquitecto do concello da Coruña. A adaptación radiofónica está dirixida por Eugenia Sanmartín.
