A Xunta adquire en Bos Aires un mural de Luís Seoane

Ata agora, para coñecer a tradición muralista de Luís Seoane, cumpría acudir a Bos Aires e visitar edificios de oficinas, residencias, parques... Agora, un anaco desa verquente artística do pintor, da que en Galicia non se conservaban pezas, está visible para sempre no Museo Gaiás da Cidade da Cultura. A Consellería de Cultura adquiriu en Bos Aires un mural elaborado polo artista para a Fábrica de Porcelanas La Magdalena. Foi Isaac Díaz Pardo quen llo encargou a Seoane como división funcional de espazos dentro da área comercial e de oficinas da empresa. O mural, que ten unha dimensión de 230x290 centímetros, está formado por catro paneis ensamblados nos que Seoane plasmou "unhas rodas lembran ás dos carros de bois, mentres que na parte inferior se atopan as ondas do mar e conta coa sinatura característica do autor no ángulo superior esquerdo". O mural é testemuña da converxencia entre unha arte de referencias galegas cunha tradición artística moi notable en América Latina, coma os murais.

Os murais de Seoane en Bos Aires, retratados para a exposición "Galicia, un relato no mundo" (Museo Gaiás, 2019).