Diana Varela Puña. Fonte: AELG. Eduardo Castro Bal (Ollo de Vidro-ACAB) (2014)
O V Premio Xosé Neira Vilas de Novela Curta foi para Diana Varela Puñal. O xurado deste galardón seleccionou a súa novela A conxura entre as quince que se presentaron ao galardón. No fallo, sinálase que a obra "constrúe un universo narrativo que se move axilmente entre o imaxinativo e o fantástico, habitado por personaxes hipnóticos e fascinantes, con descricións luminosas e unha estrutura feita a base de anacos narrativos que, malia a súa certa autonomía, logran enfiar con solvencia o inicio e o final". Ao ver deste comité "a trama resólvese, ademais, dun xeito maxistral, unindo aquí aos variados recursos literarios empregados outros procedentes dos eidos da música ou do cinema".
O galardón, que recoñece obras en lingua galega e destinadas a un público infantil e xuvenil conta cunha dotación de 1.000 euros en metálico e a publicación da obra. Varela Puñal obtivera previamente o Premio de Poesía Díaz Jácome por Afirmación en nove contos e o Premio de Poesía Uxío Novoneyra polo poemario Fíos. Tamén fora galardoada no 2012 co Premio Estornela de Teatro por Arlequino Viceversa.
O xurado estivo formado polos membros do membros do Padroado da Fundación Xosé Neira Vilas, Rosalía Morlán e Juan Andrés Fernández, e mais polo crítico Armando Requeixo. A entrega do premio desenvolverase o vindeiro 3 de novembro no Auditorio Municipal de Vila de Cruces.
