Muxía acolle unha xornada sobre Rosalía de Castro e a Costa da Morte

A Fundación Rosalía de Castro explora a relación da autora coa Costa da Morte cunha xornada temática este sábado 31 de outubro. O Parador de Muxía será a sede principal de Rosalía na Costa da Morte, un encontro que contará con relatorios de María López Sández e Manuel Vilar, que explorarán os vínculos da autora coa comarca na que ambientou a súa primeira novela, La hija del mar. O programa inclúe ademais un roteiro rosaliano pola vila guiado por Viki Ribadulla e outro poético-musical da man de Xurxo Souto. A cita finalizará cun recital a cargo de Rosalía F. Rial, Modesto Fraga, Estevo Creus, Miro Villar, Alexandre Nerium, Rafael Lema, Concha Blanco e María Canosa ao que seguirá un concerto de Belém Tajes. Para participar no evento cómpre reservar no correo da Fundación Rosalía (fundacionrosaliadecastro@gmail.com).