O outono vén cargado de actividades na Cidade da Cultura. A Fundación que xestiona o complexo compostelán anunciou un intenso programa no que amplía o seu Magosto no Gaiás a tres sábados. Os días 24 e 31 de outubro e mais o 14 de novembro haberá castañas e concertos a cargo de Luar na lubre (sábado 24), Sumrrá (día 31) e Milladoiro (14 de novembro). Como parte das medidas contra a pandemia, a degustación de castañas no se fará no propio lugar da celebración, senón que os asistentes terán que as levar para a casa e comelas alí.
En paralelo, a Biblioteca de Galicia ten en marcha desde o pasado 7 de outubro unha mostra sobre Concepcion Arenal a coincidir co seu bicentenario. A exposición recolle 65 libros a incluír biografías publicadas sobre a autora, diferentes obras da mesma e reproducións dalgunhas das súas cartas. Como parte das propostas para estes meses, o complexo propón tamén andainas guiadas para coñecer o Bosque de Galicia e os seus ecosistemas.
