Agora que en Santiago pechou o histórico Café Derby, que en outros tempos foi centro da vida intelectual da cidade cos seus faladoiros e encontros, as redes sociais e Internet son a xeografía virtual que acolle un reflexo daquel, o Café Derby 21. Con este nome cada mércores estará dispoñible na rede unha gravación sonora a xeito de programa (podcast) ofrecendo unha sobremesa cultural da man da Revista Luzes. Os xornalistas Nicolás Carreira, Carme Domínguez, Adrián Lede reuniranse cada semana cun invitado ou invitada para levar a cabo unha charla cultural distendida de case unha hora de duración. A escritora Berta Dávila foi a persoa elexida para amadriñar a primeira destas entregas que xa está dispoñible en plataformas coma Spotify, IVoox e Anchor.
