Sada celebra o centenario de Isaac Díaz Pardo

Coincidindo có día do nacemento de Isaac Díaz Pardo, este sábado 22 de agosto, o Concello de Sada quere ensalzar a figura do intelectual no ano do seu centenario programando diversos actos con todas as medidas sanitarias necesarias. "Non debíamos pasar esta data sen programar, aínda que de maneira simbólica, actos que reflexen o cariño e o respecto do noso municipio á figura cultural e artística máis destacada de Sada, e quizais de Galicia, no pasado século", sinala o alcalde Benito Portela nun comunicado emitido polo consistorio. Así o sábado desde as 12:00 horas o artista plástico sadense JA! realizará un mural nunha das paredes do espazo multiusos do Paseo Marítimo,recreando unha interpretación de A rapaza que leva na cabeza un mundo de cousas que pode precisar na vida, obra realizada a principios dos anos 70 por Díaz Pardo. A celebración do centenario finalizará cun acto que se celebrará ás 13:00 horas no Auditorio da Casa da Cultura onde se ensalzará a vida e obra do fillo adoptivo de Sada cunha proxección de imaxes e un vídeo mostrando a vida do intelectual, participarán familiares e achegados de Isaac Díaz Pardo, a Asociación Cultural Irmáns Súarez Picallo e a agrupación musical Nova Troula.



Paralelamente e durante todo o mes de agosto a Concellería de Cultura programa unha exposición de rúa coordinada pola Asociación Cultural Irmáns Suárez Picallo co título "Isaac 1920-2020". En 20 paneis situados en cinco cubos ao longo da avenida da Mariña, fronte ao edificio de A Terraza, poderase contemplar a vida e obra de Isaac Díaz Pardo. A biografía do autor e a súa vinculación coas Cerámicas do Castro e o Museo Carlos Maside; a faceta artística de Díaz Pardo e distintas pezas de porcelana creadas polo artista ocuparán os paneis da exposición.