Imaxe promocional do Camiño Escena Norte 2020
Aos poucos, e logo do confinamento pola crise sanitaria, o calendario escénico do ano comeza a tomar forma. Deste xeito, a segunda xeira do proxecto de intercambio escénico Camiño Escena Norte ten xa novas datas de celebración. A Xunta de Galicia e a organización deste programa asinaban o pasado 10 de xullo o convenio polo que o Goberno Galego participa deste encontro canda a Asturias, Cantabria e País Vasco. Entre o 13 de setembro e o 11 de outubro Mondoñedo, Lugo, Ribadeo, Sobrado dos Monxes, Vilalba, Arzúa e Compostela acollerán oito funcións a cargo de compañías asturianas, cántabras e vascas ademais das actividades paralelas do Camiño Expandido. Como contrapartida, dúas compañías galegas levarán os seus traballos a escenarios das outras comunidades participantes.
Tamén a histórica Mostra de Teatro Galego de Cariño anunciou as datas da que será a súa XLII edición. Aínda pendente de dar a coñecer o seu programa, o concello adiantou que o encontro se desenvolverá entre o 9 e o 21 de agosto a adaptar o seu formato ás medidas de seguridade derivadas da Covid-19. Así, as funcións de rúa desenvolveranse en recintos delimitados e con reserva previa, o auditorio só se empregará á metade da súa capacidade e será obrigatorio o uso de máscara durante toda a función.
